3Jo | TPZ | STEP |

3 JON

O kiun vaßih, eß o vakön kiun ne Jon to kiun voh. Ivëhkëk, eß to hikta vahoß hop a ëhnaneah manih po kiun vaßih. Eß to soe varoe vamanih pan, ‘Eöß e voe manot, paröß vovoh ka noß neöm, o kiun vëh to taneß nös peöß’. O kiun vëh neß to kiun to nö non pa teß va po vaman vëh, a ëhnaneah e Gaëus. Eß to kiun, pareß soe vavaeö poan, suk a ö neß to matop vavih non a nap kiu pe Sosoenën. Ivëhkëk, manih pa meh teß va po vaman vëh, a ëhnaneah e Diotrefes, neß to vavaato suk non a ma taateß hat peß.

A ma kiun varih to tataki va ne manih pan,

A potan avih pe Jon, 1:1-4E Jon to soe vavaeö e Gaëus, 1:5-8E Jon to soe vövöknah e Diotrefes, 1:9-10E Jon to vaato suk a ma taateß vih pe Demitrius, 1:11-12A soe ataaton pe Jon, 1:13-15

3 John

Ea Se Vaßaus A Napan Pe Kristo To Vavaasis Ne A Soe Vih

1 Eöß a Te Apuh va po kum teß varih to vaman ne e Ieesuß, to kiun ka nös oah Gaëus e vakamöß vih peöß, eöß to iu vi rakah ka nom oah manih pa soe man.

2 Vakamöß vih peöß, eöß to nat e noß pa apeomah to teß vih e non, paröß hinhin noß na e Sosoenën pan, a ma tah kurus nën to nonok nom, me a sioniumah se teß vavih non. 3 Eöß to vaeö rakah voh pa ö no a ma pah kea to nö maß ko soe a ö nën to vaman va nom a soe man, me a ö nën to vavatet nom a soe man. 4 Ahikta meh tah se heß a neoß o vaeö to apuh oah non a ö nöß to nat o teß varih to teß va ne pa ma koaß peöß, to vavatet ne a soe man.

5 Vakamöß vih peöß, eß to paraß vih rakah pa ö nën to vaßaus a kën kea varih, to nönö vah ne pa vatvus a Soe Vih pe Ieesuß. Eën to vaßaus pet voh eöm po upöm teß varih to nönö vah ne pa vatvus a Soe Vih pe Ieesuß, nën to hikta nat nom pee. 6 Ee to soe tavus ke voh ee po kum teß varih to vaman ne e Ieesuß manih, po iu vih pën. Eën se vavaßaus rakah nom raoe pa ma taneah nee to kökööt ne pa vapet a nö pee, pa taateß to ep vavih non manih pe Sosoenën. 7 Ee to taneo voh a kiu pee manih pe Kristo, pare hikta hin, keß, öt taneß ta pah tah manih po teß to hikta vaman ne e Kristo. 8 Ivëh, ka se vaßaus rakah no a pap teß poë varih, suk ataeah, ea se keh nok va nën, ea to teß vaßpeh me e no pee pa nok a kiu va pa soe man.

9 Eöß to kiun ke voh eoß na po kum teß varih to vaman ne e Ieesuß, ivëhkëk, e Diotrefes a teß to iu non a vovoh ke raoe to hikta iu pënton a no möm. 10 Ivëh köß se keh nö nös, eöß se vaato suk a ma taneah ne Diotrefes to nonok non, me a ö neß to pikpiuk non, me a ma soe hat neß to sosoe non manih pemöm. Ivëhkëk, eß to hikta teß varoe non pan a tah pamëh, eß to hikta iu vaoe me non a ma meh kën kea varih to vaman ne e Kristo, pare vavatvus vah nee a Soe Vih pe Kristo, manih pa iuun peß. Pareß sosoepip e non po upöm teß to iu vaoe ne raoe, ko kiiki e non pee këh o kum teß varih to vaman ne e Ieesuß.

11 Vakamöß vih peöß, koe a vatet a ma taateß hat po upöm teß, parën vatet varoe o teß varih to nonok ne a ma taateß vih. Eteh to nonok non a taateß vih, eß a teß pe Sosoenën. Ivëhkëk, eteh to nonok non a taateß hat to hikta nat non pe Sosoenën.

12 O teß kurus va po kum teß varih to vaman ne e Ieesuß to sosoe e ne pan, e Demitrius a teß vih, to vavatet non sih a ma soe man varih, no a soe pe Sosoenën to sosoe non a ö na se vavatet no. Emöm me to sosoe e nem peß a teß vih, kën nat e nom pa tah nöß to sosoe noß to teß man e non.

13 Eöß to teß me e noß pa ma tah peo noß se kiun ka nös oah, ivëhkëk, eöß to hikta iu kiun noß nös to kiun. 14 A siß ö hat, köß nö eoß nös pa vaato me a oah. 15 A taateß moomo to teß me a nom oah. A ma vakamöß varih to heß nös a potan avih pee manem pën. Eën se heß me a potan avih peöß manem pa ma papaeh vakamöß manem.